Booliska DFS Oo War Kasoo Saaray Gaadiid Lagu Gubay Koonfur Galbeed

Taliska Booliska dowladda Federaalka Soomaaliya ayaa ka hadlay gaadiid nooca xamuulka qaado ah oo xalay lagu gubay deegaan ka tirsan Gobolka Bakool ee Maamulka Koonfur Galbeed Soomaaliya.

Qoraal kasoo baxay Taliska Booliska dowladda ayaa waxaa lagu sheegay in 7 gaadiid oo ah kuwa xamuulka la gubay, isla markaana u rarnaa dad shacab ah, xili ay socdaal ku marayeen deegaanka lagu magacaabo Emed Kooreey ee Bakool, iyagoo kusoo baxay Magaalada Baladweyne ee Gobolka Hiiraan.

Sidoo kale Taliska Ciidanka Booliska dowladda ayaa sheegay in gaadiidkaas ay gubeen xubno ka tirsan Al-shabaab, kadibna ay baxsadeen, waxaana gaadiidkaas uu kusii jeeday degmada Xudur ee Gobolka Bakool.

“Abaare 08:00 fiidnimo Al-shabaab waxaa ay ku gubeen 7 gaadiid ah oo nuuca xamuulka qaada ah bananka hore ee Tuulada EMED KOOREEY ee Gobolka Bakool, gadiidkaan oo ay lahayeen isla markaana u rarnaa dadka shacabka ah, ayaa ka soo baxay Baladweyne kuna sii jeeday Xudur” ayaa lagu yiri Qoraalka Taliska Booliska.

Booliska dowladda Federaalka Soomaaliya ma shaacin khasaaro ka dhashay gaadiidkaas la gubay oo la gaarsiiyay Darawaladii waday, hayeeshee Booliska ayaa ka hadlay oo kaliya in 7 gaadiid ah la gubay.

Al-shabaab ayaa horey dhowr jeer u gubay gaadiid badan oo siday dhuxul, xili ay ku socdaalayeen deegaano ka tirsan gobolada Shabeellaha Hoose iyo Dhexe, waxaana gaadiidkaas lahaa Ganacsato Soomaaliyeed.