DF iyo Midowga Yurub oo shir ku yeeshay Muqdisho

Wasiirka amniga Soomaaliya Maxamed Abuukar Isloow Ducaale ayaa maanta shir guddoomiyay kulan looga hadlayay horumarinta ciidanka Booliska Soomaaliyeed heer federaal iyo heer dowlad goboleed, kaas oo lagu ansixiyey dhaqalaha qorshaha sugidda amniga Stadium Muqdisho oo ciidanka Booliska dhawaan lagu wareejiyey.

Shirkan oo u dhaxeeyay Dowladda Soomaaliya iyo Midowga Yurub ayaa dowladda waxa ay soo bandhigtay baahiyaha gaarka ah ee la xiriira horumarinta ciidanka Booliska Soomaaliyeed oo ay soo diyaarisay Wasaaradda amniga Qaranka.

Wasiirka amniga Soomaaliya Maxamed Abuukar Islow Ducaalle ayaa wuxuu sheegay qorshahan inuu ahaa mid ay horey u kala saxiixdeen dowladda federaalka iyo Midowga Yurub, islamarkaana EU-da ay taageereyso qorshaha horumarinta ciidanka Booliska.

“Shirkan wuxuu daba socdaa midkii hore oo aan ku kala saxiixanay 42 Million oo lagu kobcinayay Booliska heer federaal iyo heer dowlad goboleed, maanta waxaa la ansixiyay 80% baahiyaha ay gudbiyeen dowladda dhexe iyo kuwa maamul goboleedyada, aad ayaan ugu faraxsanahay waxan dhihi karaa Soomaalida meel kasta oo ay joogto waa guul u soo hoyatay”. Ayuu yiri Wasiirka amniga.

Shirkan oo mid kale uu ka dambeyn doono ayaa qeyb ka ah dadaalada dowladda Soomaaliya ay ugu jirto horumarinta ciidanka Booliska Soomaaliyeed heer federaal iyo heer dowlad goboleed.