Dowladda oo sheegtay bisha December in Muqdisho Stadium lagu qabanayo tartanka D/Goboleedyada

Wasaaradda dhalinyarada iyo cayaaraha ee xukuumada Soomaaliya ayaa sheegtay in tartanka dowlad goboleedyada iyo gobolka Banaadir sanadkan lagu qabanayo garoonka Stadium Muqdisho.

Wasaarada ayaa sheegtay in tartanka la qabanayo bisha December sidaasi darteedna hada laga howlgalayo sidii suura gal loogu dhigi lahaa in garoonkaas lagu qabto tartanka.

Khadiijo Maxamed Diiriye, wasiirka wasaarada dhalinyarada iyo xayaaraha ee xukuumada Soomaaliya ayaa sheegtay in mar dhaw garoonka lagu bilaabayo dib u dayactir iyo qalabeyn.

Wasiirada ayaa sidoo kale sheegtay in hada xooga la saarayo sidii amniga guud ee garoonka Stadium Muqdisho loo sugi lahaa oo ciidamada booliiska ay u xaqiijin lahaayeen.

Waxa ay tilmaamtay in maamul goboleedyada iyo gobolka Banaadir ay kala tashan doonto qabsoomida taranka iyo in garoonka sanadkan lagu qabto.

Garoonka Stadium Muqdisho oo la dhisay Sanaddii 1978-dii ayaa lagu qaban jiray in badan oo ka mid ah ciyaaraha sida kubbadda cagta, kolayga, miiska, dabaasha iyo kuwo kale oo badan, iyadoo sidoo kalena ahayd goob muhiim u ah isu imaatinka bulshada xilliyada ay jiraan munaasabadaha, waxaana bishii hore si rasmi ah logu wareejiyay ciidamada booliiska Soomaaliya.