Duqii hore ee Muqdisho:Tarsan oo ka hadlay caburinta Siyaasiyiinta

Guddoomiyihii hore ee Gobolka Banaadir ahaana Duqii Muqdisho hadana ah La Taliyaha dhinaca siyaasadda ee xafiiska Madaxweynaha Soomaaliya Maxamuud Axmed Nuur (Tarsan) oo la hadley warbaahinta Risaala ayaa ka hadlay arrimo badan oo la xiriira xaalada dalka.

Tarsan oo arrimaha uu ka hadlay ay ka mid ahaayeen arrinta la xiriirta in caburin lagu haayo siyaasiyiinta ku nool magaalada Muqdisho ayaa waxa uu sheegay inuu aaminsan yahay in aysan jirin wax caburin ah oo lagu haayo siyaasiyiinta, qof walbana uu xaq u leeyahay inuu fikirkiisa ka hadlo.

Wuxuu sheegay Duqii hore ee Muqdisho Tarsan hadalka qofka uu ku hadlayo inuu leeyahay xad, balse aanay aheyn in la sheego wax ummadda iska horkeenaya, oo ka dhalan kara burbur iyo xasilooni daro siyaasadeed.

Sidoo kale wuxuu sheegay La Taliye Tarsan in aanan hormar la gaareyn, hadii dadka la caburiyo, wuxuuna ku taliyay inaanan dadka la caburin, si ay u sheegaan waxa niyadooda ka guuxaya.

“Anigu caburin ma aaminsani, qofka xuriyatul qowl ayuu leeyahay, laakiin xuriyatul qowlka xad ayuu leeyahay, qofka waxa uu dhahaayo waa inuu masuuliyadeeda qaado, waxa ummadda isku diraya in aysan noqon, balse hormar lama gaari karaayo hadii aanan fikirka si xor ah loo dhiibaneynin”. Ayuu yiri Tarsan.

Hadii aan dib u xusuusano Siyaasiga C/raxmaan C/shakuur Warsame ayaa la xiray 18-kii December 2017, kadib markii ciidamada ammaanka ay xilli habeen ah weerar ku qaadeen hoyga Magaalada Muqdisho uu ka dagan yahay, halkaasina ay ku dileen Lix ka mid ah ilaaladiisa, balse wada hadal kadib waxaa dib loo soo daayay Siyaasiga C/raxmaan Warsame.

C/raxmaan C/shakuur Warsame, ayaa sababta loo weeraray waxaa inta badan lagu sheegay, dhaliilo kul kulul oo muddooyinkaas dambe uu Madaxda Dowladda Federaalka u marinayay Warbaahinta.